Beidh sraith nua faisnéise 5 chlár darbh ainm Dúiseacht a leanann saol mhuintir Chorca Dhuibhne thar tréimhse 6 mhí á chraoladh ag TG4 ó Bhealtaine go Deireadh Fómhair na bliana 2020.
Leanann an sraith spéisiúil so an pobal ag dul i ngleic leis an saol in aimsir Covid 19 agus an dúthaigh ag iarraidh teacht chuige héin i ndiaidh an chéad tréimhse dianghlasála.
S’é an craoltóir aitheanta Mícheál Ó Muircheartaigh a dhéanann tráchtaireacht ar an tsraith. Le linn na paindéime chaith Mícheál go leor ama ar a fhód dúchais i nDún Síon ar an taobh thoir don Daingean.
S’é Mícheál a spreag teideal na sraithe nuair a thagair sé do nath cainte a bhí óna mháthair chríonna, athá luaite i mBailiuchán na Scol, “Dúiseacht le dúthracht le breacadh an lae”.
Thug go leor daoine suntas don nath cainte seo nuair a luaigh Mícheál é ar an Late Late Show go luath le linn na pandéime.
Tugann ‘Dúiseacht’ léargas dúinn ar na dúshláin a bhí ag tabairneoirí, úineírí agus bainsteoirí caiféanna, scoileanna agus gruagairí i gCorca Dhuibhne agus iad ag dul i ngleic leis an gcoróinvíreas.
Sa sraith éagsúil, cifimíd leis conas mar a théann an tréimhse seo i bhfeidhm ar cheoltóirí agus amhránaithe, athá chomh lárnach i saol na Gaeltachta so.
Táid go léir ag maireachtáil leis an neamhchinteacht, an strus agus an bhrú, agus aghaidh á thabhairt aca ar an tráth is dúshlánaí lenár linn.
[Note: I write dialectically in Gaelainn Chorca Dhuibhne which is why some words are spelled differently]